اليابان: البلد الذي يفاجئك بالنظام قبل الجمال

تخيل تنزل مطار وتضيع في المترو، وتوقف صاحبة مقهى شغلها عشان توصّلك للمحطة بنفسها. هذي اليابان. أغلى من كوريا وأبعد، صح، لكن فيها ديزني ويونيفرسال وعالم الأنمي كله، وشعب يخليك تحس إنك ضيف مو سائح.

الخط اللي نرشّحه لأغلب العوائل: 5 أيام طوكيو، يومين كيوتو، 3 أوساكا. وإذا عندك أسبوعين زيد نارا وتاكاياما وكانازاوا. بين المدن الشينكانسن، وداخل المدينة المترو، وقوقل مابس يقولك المحطة والرصيف ورقم العربة حتى.

أول يوم بتلاحظ ثلاث أشياء: هدوء تام في القطار، طوابير منظمة قدام كل شي، وما فيه سلال زبالة أبداً. وعند الكاشير تحط الفلوس في صحن صغير مو في يده 😄